La Seguridad Social suma 129.000 afiliados en abril y cierra el cuatrimestre con una creación de 420.000 empleos

O número de afiliados á Seguridade Social aumenta en 128.824 persoas en abril en termos desestacionalizados e supera os 20,6 millóns (20.661.195) por primeira vez. É o mellor abril desde que hai rexistros e pecha un cuadrimestre no que se sumaron 420.301 ocupados, o que tamén supón o mellor inicio de ano da serie histórica.

O nivel actual supera en case 1,2 millóns de persoas o número de afiliados que existía antes do inicio da pandemia (febreiro 2020).

Mantense o dinamismo do emprego en actividades innovadoras

O crecemento do emprego respecto ao nivel previo á pandemia é notable en sectores de alto valor engadido como Informática e Telecomunicacións, cuxo número de afiliados creceu un 21,6 % respecto aos que rexistraba antes da pandemia, ou Actividades Profesionais, Científicas e Técnicas, que presenta un crecemento do 12,8 %. Desde o fin da pandemia, un de cada catro novos afiliados incorporouse a estes sectores altamente produtivos.

Todas as comunidades autónomas presentan niveis de emprego superiores aos que tiñan antes da pandemia. Destaca o aumento da afiliación na metade sur do país e nos arquipélagos, cun incremento do emprego superior ao 6,4 %.

O 86% con emprego indefinido

Dezaseis meses tras a entrada en vigor da reforma laboral, continúan a ser patentes os seus efectos positivos na estabilización do emprego e na melloría da súa calidade.

En abril, a porcentaxe de afiliados con contrato temporal mantense no mínimo histórico do 14%, menos da metade do que se rexistraba antes da reforma (30%).

No caso dos menores de 30 anos, a temporalidade reduciuse en 32 puntos respecto ao nivel que tiña antes da reforma, pasando do 53% ao 21%.

En conxunto, agora hai case 2,9 millóns de afiliados máis con contrato indefinido que en decembro de 2021, o último mes antes da entrada en vigor da reforma.

Outro indicador do incremento da estabilidade é o aumento da duración media dos contratos que causaron baixa. Entre xaneiro e abril deste ano, creceu en 62 días en comparación coas cifras do mesmo período de 2019, último ano homologable anterior ao impacto da pandemia.

Dos 4,1 millóns de afiliados que tiñan un contrato temporal no primeiro trimestre de 2022 e seguen en alta, o 53% son indefinidos en abril de 2023; é dicir, 2,2 millóns. A maioría, 1,8 millóns son indefinidos ordinarios, e 394.000 son fixos descontinuos. Os sectores onde máis temporais pasaron a ser fixos son: Comercio e Reparación de Vehículos, Hostalaría, Construción e a Industria Manufactureira.

Por outra banda, o número de traballadores en ERTE mantense en niveis mínimos, ao redor dos 13.000, e supoñen o 0,1 % do total de afiliados.

Afiliación media

Finalmente, en termos orixinais, a afiliación media á Seguridade Social gañou en abril 238.436 afiliados, o que supón un incremento intermensual do 1,17 %. É o maior aumento de afiliados medios nun mes de abril e o segundo maior en termos absolutos en toda a serie (o máis alto corresponde a xullo de 2005).

O número de afiliados medios sitúase así en 20.614.989 (10.888.405 homes e 9.726.584 mulleres) , a cifra máis alta na serie. Son 595.908 afiliados máis que hai un ano, o que representa un crecemento de case o 3% interanual.

Información adicional no Excel e na web:

https://w6.seg-social.es/PXWeb/pxweb/es