El Gobierno aprueba la revalorización de más de 12 millones de pensiones y prestaciones en 2025

Ministroen Kontseiluak astelehen honetan onartu duen Errege Lege Dekretuaren arabera, 2025erako Gizarte Segurantzako sistemaren pentsioak, Estatuko Klase Pasiboenak eta beste prestazio publiko batzuenak handituko dira. Igoera datorren urtarrilaren 1etik dago indarrean, eta Gizarte Segurantzako sistemako eta Estatuko Klase Pasiboetako pentsioen igoera %2,8koa izango da.

Guztira, 12 milioi pentsioren balioa handituko da, eta, ondorioz, pentsiodunen erosteko ahalmena mantendu edo handitu egingo da. Horien artean daude, besteak beste, pentsio kontributiboak eta ez-kontributiboak jasotzen dituztenak, Klase Pasiboetakoak, Bizitzeko Gutxieneko Diru-sarrera eskuratzen duten familiak eta % 65eko desgaitasuna edo handiagoa duen norberaren ardurapeko seme-alabagatiko esleipena onartuta dutenak.  

Inklusio, Gizarte Segurantza eta Migrazio ministro Elma Saizek ziurtatu duenez, “gure herrialdeko herritarren %25 inguruk etekina aterako diete gure pentsiodunen erosteko ahalmena bermatzen duten neurri horiei. Aldi berean, bereziki pertsona zaurgarrienak babesten dira, gutxieneko pentsioak eta kotizazio gabekoak jasotzen dituztenak”.

Igoera hori 2023ko abendutik 2024ko azarora bitarteko batez besteko kontsumoko prezioen indizearen (KPI) emaitza da, Pentsioen erosteko ahalmena bermatzeari buruzko 20/2021 Legean ezarritako formularen arabera, 2021ean onartua eta gizarte-solaskideekin adostua. Horrela, Toledoko Itunaren 2. gomendioa betetzen da, KPIaren bilakaeraren arabera pentsiodunen erosteko ahalmena legez bermatzen duena.

"PPren aurreko Gobernu Legearekin, 1090 euroko pentsio bat hilean 19 euro bakarrik haziko litzateke 7 urtetan, 2018 eta 2025 artean.Koalizio Gobernuari esker, lege bidezko prezio igoeraren araberako errebalorizazioa bermatu baitu, pentsio hori bera hilean 270 euro igo da. 4.000 euro gehiago urtean", esan du Elma Saizek.

Balio-handitzeak, gutxi gorabehera, urtean 600 euro gehiago ekarriko dizkie batez besteko erretiro-pentsioa duten pertsonei, eta sistemaren batez besteko pentsioak, berriz, urtean 500 euro inguru igoko dira. Igoera horrek mesede egingo die 10,3 milioi pentsio kontributibo jasotzen dituzten 9,3 milioi pertsona ingururi, Estatuko Klase Pasiboen Erregimenari dagozkion 720.148 pentsioez gain.

Beraz, hilean 1.441 euroko pentsioa (2024ko erretiro-pentsioarekin bat datorrena) jasotzen duen pentsiodun batek hilean 1.481,35 euroko pentsioa jasoko du 2025ean, hau da, urtean 564,87 euro gehiago jasoko ditu.

Genero-arrakala murrizteko osagarriaren balioa % 8,1 handituko da 2024an onartutako zenbatekoarekiko, eta hilean 35,9 euro izango da seme-alaba bakoitzeko.

Gutxieneko pentsioak eta kotizazio gabekoak

Gutxieneko pentsioen, kotizazio gabeko pentsioen (KGP) eta EBIaren igoera ere adostu du gaur Gobernuak, 2/2023 Errege Lege Dekretuan ezarritakoarekin bat eta Toledoko Itunaren 15. gomendioari jarraikiz.

Gutxieneko pentsioak %6 inguru igoko dira 2025ean. Hala ere, ehuneko hori handiagoa da ezkontidea ardurapean duten pentsioetan eta familia-kargak dituzten alargun-pentsioetan, horiek %9,1 handituko baitira. Bestalde, kotizazio gabeko pentsioak eta Bizitzeko Gutxieneko Diru-sarrera %9 igoko dira.

SOVI pentsioak (Zahartzaroko eta Baliaezintasuneko Nahitaezko Asegurua) ere %6 igoko dira 2025erako; konkurrentziarik ez dutenen kasuan, hilean 560 eurora iritsiko dira, eta konkurrentziadunen kasuan, 543,60 eurora.

Pertsona bakarreko etxeek urtean 12.241,6 euroko gutxieneko erretiro-pentsioa izango dute (2024an 11.552,8 eurokoa izan zen), eta ezkontidea ardurapean dutenen kasuan 15.786,4 eurokoa (2024an 14.466,2 eurokoa izan da).

2025ean, % 65eko edo gehiagoko desgaitasuna aitortua duen ardurapeko seme-alaba edo adingabe bakoitzeko esleipena urtean 5.805,6 eurokoa da, eta % 75eko edo gehiagoko desgaitasuna aitortua duen ardurapeko seme-alaba edo adingabe bakoitzeko esleipena, berriz, urtean 8.707,2 eurokoa da, hau da, % 2,8ko urte arteko igoera.

Gizarte Segurantzako sistema indartzea

Etorkizuneko pentsioak babesteko helburuarekin eta Gizarte Segurantzako sistemaren diru-sarreren eta gastuen arteko oreka bilatzeko, onartu diren azken erreformetan hainbat neurri artikulatu dira, hala nola elkartasun-kuota eta kotizazioko gehienezko oinarrien igoera, eta horiek ere testu honetan jaso dira.

Elkartasun kuota gehigarriari esker, kotizazioak jasotako ordainsari osoa kontuan hartzea aurreikusten da. Elkartasun-kuota hori Estatuko Aurrekontu Orokorren Legean urte bakoitzerako finkatutako gehieneko kotizazio-oinarriaren eta lanaren bidez jasotako benetako etekinen arteko aldeari aplikatuko zaio.

Aplikatu beharreko kotizazio-tasa progresiboa izango da, ezarritako errendimenduen hiru tarteen arabera (% 0,92, % 1 edo % 1,17), eta 2025etik aurrera pixkanaka handituko da, 2045era arte, orduan lortuko baita behin betiko tasa.

Bestalde, Belaunaldien arteko Ekitate Mekanismoa (EEM) kontzeptuari dagokion kotizazioa % 0,8an ezarri da, eta banaketa % 0,67koa da enpresaburuaren kontura eta % 0,13koa langilearen kontura.

Pentsio-sistemaren jasangarritasunaren ildotik, gehieneko kotizazio-oinarria handitu egingo da 2025ean, inflazioaren igoerarekin eta portzentaje gehigarri batekin bat etorriz. Gizarte Segurantzako sistemaren izaera kontributiboa ziurtatzeko, igoera horrekin batera gehienezko pentsioa igoko da (3.267,60 euro hilean).