El Fondo de Impacto Social impulsa el crecimiento de la empresa UNEI con 3M€ para abordar el reto de la inserción laboral de las personas con discapacidad

O Fondo de Impacto Social (FIS) , xestionado por COFIDES e adscrito ao Ministerio de Inclusión, Seguridade Social e Migracións, respaldará o crecemento da empresa social andaluza UNEI, cuxo obxectivo é a inserción laboral de persoas con discapacidade, especialmente con problemas de saúde mental. Este é un dos retos sociais que está a contribuír a paliar o FIS a través do apoio financeiro e técnico a esta empresa.

A presidenta e conselleira delegada de COFIDES, Ángela Pérez, e o director xeral da empresa sevillana, Rafael Cía, asinaron hoxe, en presenza da secretaria xeral de Inclusión, Elena Rodríguez, o a cordo de financiamento polo que o FIS concede un préstamo de tres millóns de euros a UNEI, co que financiará o seu plan estratéxico para os próximos cinco anos e incrementará, polo menos, nun 13,5 % o seu cadro de persoal con discapacidade neste mesmo período.

Ademais, o FIS proporcionará unha asistencia técnica para a formación de persoal con discapacidade en loxística con valor engadido técnico, un ámbito no que UNEI está reforzando a súa actividade e creando oportunidades de emprego cada vez máis cualificado para estes colectivos.

UNEI é a empresa social líder en Andalucía en empregabilidade de persoas con discapacidade e referencia en España en emprego de persoas con problemas de saúde mental. Reinviste o 100% dos seus beneficios en proxectos que permiten a creación de novas oportunidades de emprego.

A compañía cumpre o seu fin social a través do desenvolvemento competitivo no mercado de diferentes liñas de negocio: loxística, facility services, conservación ambiental, desenvolvemento tecnolóxico de teleasistencia avanzada e xestión de espazos deportivos.

87% do cadro de persoal con discapacidade

Na actualidade, a empresa ten un cadro de persoal integrado por máis de 1.600 persoas, das que o 87% ten algunha discapacidade e o 50% discapacidade derivada de problemas de saúde mental, un colectivo considerado de difícil inclusión.

A secretaria xeral de Inclusión, Elena Rodríguez, destacou que “con este investimento, o FIS atende un dos principais retos sociais: mellorar a empregabilidade das persoas con discapacidade. Ademais, aborda a atención da saúde mental, unha prioridade para o Goberno de España. O obxectivo é que cada persoa teña a oportunidade de desenvolver todo o seu potencial e acceder a un emprego digno, en igualdade de condicións. Con este modelo de colaboración público-privada multiplicamos resultados”.

A presidenta e conselleira delegada de COFIDES, Ángela Pérez,afirmou que “UNEI é un claro exemplo de empresa con propósito que demostrou que a rendibilidade económica e o compromiso social poden ir da man xerando un alto impacto sostido no tempo. Foi pioneira na economía social en España e alcanzou un nivel de excelencia e estabilidade ao longo de 30 anos, ata converterse nun referente internacional. Por todo isto, é moi satisfactorio respaldar, co financiamento do FIS que xestiona COFIDES, o crecemento dunha empresa que, con cinco liñas de negocio diversas, fixo da integración e a igualdade de oportunidades a súa razón de ser”.

O director xeral de UNEI, Rafael Cía,valorou que, “co financiamento de COFIDES, UNEI executará o seu Plan Estratéxico 2024-2027, potenciando o crecemento da compañía e consolidando as súas instalacións loxísticas. Todo iso, co compromiso de ampliar, polo menos nun 13,5 %, o número de persoas con discapacidade, sobre todo derivada de problemas de saúde mental, no equipo”.

Fondo de Impacto Social

O FIS é un fondo creado polo Goberno a través da addenda do Plan de Recuperación, Transformación e Resistencia (PRTR) e conta con recursos do instrumento NextGenerationEU.

O obxectivo deste instrumento financeiro público, dotado con 400 millóns de euros, é fortalecer o ecosistema de impacto a través do apoio a proxectos de investimento realizados por empresas e outras entidades en España que xeran un impacto social e/ou ambiental positivo e medible.