El Gobierno aprueba el nuevo Marco Estratégico contra el Racismo y la Xenofobia

Inklusio, Gizarte Segurantza eta Migrazio Ministerioak proposatuta, Ministroen Kontseiluak Arrazakeriaren eta Xenofobiaren aurkako Herritartasun eta Inklusiorako Esparru Estrategiko berria onartu du (2023-2027). Esparru estrategiko berri honek Europar Batasuneko Estatuek arrazakeriaren aurkako plan espezifikoak izateko hartutako konpromisoari erantzuten dio, eta 2011n eta 2014an onartutako estrategiak berritzen ditu, elementu garrantzitsu berriak txertatuz, hala nola gorroto diskurtsoa Interneten.

Administrazioaren hiru mailekin, gizarte eragileekin eta gizarte zibileko erakundeekin –etorkinen elkarteak tartean– elkarrizketa, parte-hartze eta adostasun prozesu zabalarekin osatu da esparrua.

Esparru Estrategikoak bi helburu nagusi ditu: pertsona migratzaileen integrazioan eta inklusioan aurrera egitea eta arrazismoa, xenofobia eta horiekin lotuta dauden beste intolerantzia moduak prebenitu eta borrokatzea. Horretarako, sei ekintza-ildoren gaineko zeharkako jarduerak proposatzen ditu, eta, horietako bakoitzerako, zenbait helburu eta adierazle definitu dira, egoeraren eta bilakaeraren segimendua egiteko. Administrazio guztien eta gizarte zibil osoaren politika publikoak inspiratzeko jarduera-proposamen integrala, borondatezkoa eta malgua da Esparrua.

Bi jarduera-ildo nagusiak xenofobiaren, arrazakeriaren eta intolerantziaren aurkako prebentzio-, sentsibilizazio- eta esku-hartze neurriei eta xenofobiaren, arrazakeriaren eta intolerantziaren biktimei emandako arretari eta erreparazioari buruzkoak dira. Lehenengoaren barruan, Estatuko Fiskaltza Nagusiaren aurrean salaketa prozedura bat jarri da, motibazio arrazista eta xenofoboko gorroto-diskurtsoaren ustezko delituak salatzeko, eta horri esker, Arrazakeriaren eta Xenofobiaren Espainiako Behatokiak (OBERAXE) urrats bat gehiago eman dezake bere lanean, eztabaida publikoa zikintzen duten gorroto-mezuen aurka. Prozedura berri horren arabera, OBERAXEK bost salaketa aurkeztu ditu.

Esparru Estrategiko berriak atzerritartasun- eta nazionalizazio-prozesuekin lotutako arlo juridiko-administratiboko jarduerak ere aurreikusten ditu, besteak beste; arreta humanitarioarekin eta nazioarteko babesa eskatzen duten pertsonen harrerarekin lotutako gaietan, arreta berezia jarriz pertsonen zaurgarritasunean; gizarteratze aktiboan, etxebizitzaren, enpleguaren, osasunaren edo hezkuntzaren arloko diskriminazioa saihesteko; eta, azkenik, parte-hartzeari eta elkarbizitzari dagokionez, espazio publikoei eta tokiko agintariekin eta gertuko poliziekin lankidetzan jarduteari buruzko neurriekin.

Gainera, Esparru Estrategikoaren jarduera-ildoak gauzatze aldera, Jarraipen eta Ebaluazio Batzorde bat sortzea aurreikusten da. Batzorde horrek hobekuntzak proposatuko ditu adierazle espezifikoetan eta ad hoc azterketetan oinarrituta. Gainera, autonomia erkidego guztiek euren integrazio eta arrazakeria prebenitzeko planak egingo dituzte.